Mogadishu,12th November 2001
By Banadir.com

Warar lagu kalsoon yahay oo iminka inaga soo gaaray magaalada Muqdsiha ayaa sheegaya in Madaxweynaha Dawladda KMG ah Cabdiqassim Salaad Xasan uu u magacaabay jagada Ra'iisul Wasaaraha Xasan Abshir Faarax oo hore uga tirsanaa Golihii Wasaarada ee Cali Khaliif oo Baarlamaanka kalsoonidii kala noqday bishii ina soo dhaaftay ee Oktoobar, isagoo ka ahaa Wasiirka Macdanta iyo Biyaha .

Waana Xukuumadii labaad ee la soo dhiso muddo ka yar sanad iyo bar tan iyo markii magaalada Carte ee dalka Jabuuti lagu soo gunaanaday shirkii nabadeynta Soomalida dhamaadkii bishii August 2000 .

Hadaan yaraha u leexano taariikh nololeedka Ra'iisul Wasaaraha la soo magacaabay, Wuxuu Xasan Abshir ka soo qabtay mansabyo kala duwan maamulkii milatariga ee Maxamed Siyaad , isagoo noqday Duqa magaalada Muqdisho, kadibna Guddoomiyaha Gobolka Shabeelaha Dhexe .

Wuxuuna uga danbeyntii Safiir ka noqday Safaaradaha Soomaaliyeed ee Bonn(Germany). Wuxuu kaloo jago ka soo qabtay maamul goboleedkii Dawladda Puntland kadib burburkii Dawladii Siyaad.