XILDHIBAANADA BEESHA MAREEXAAN UGU JIRO BARLAMAANKA KMG OO BEENIYAY IN ITOOBIYA SOO GASHAY BELED XAAWO.

Xildhibaanada beesha Mareexan ugu jira Golaha Baarlamaanka KMG ayaa beeniyay in Itoobiya soo weerartay gudaha Soomaaliya isla markaana qabsatay magaalad Beled-Xaawo.

Hilowle Aadan oo la hadlayay saxaafada ayaa yiri "Xasan Abshir Faarax markii uu moorgan qabsanayay Kismaayo wuxuu lahaa wax Itoobiyaan ah oo la socday Moorgan majiraan, hadana wuxuu la taagan yahay Itoobiya ayaa qabstay gobolka Gedo, taasina waa been aan sal iyo raad toona lahayn" Dhanka kale shir ay isugu yimaadeen SNFta gacan saarka la leh SRRCda Degmada Baardheere oo ay ka soo qaygaleen odayaal dhaqameed yada beesha ayaa waxaa odayaasha lagu wareejiyay Col. Cabdirisaaq Isaaq Biixi, ayadoo Col .Cabdirisaaq horay loo sheegay in la dilay.

SARKAAL U HADLAY KOOXDA XUSEEN CEYDIID OO DIGNIIN U JEEDIYAY GEN. NAAJI

Sarkaal sare oo u hadlay garabka hubeysan ee ururka USC/SNA ee uu hogaamiyo Xuseen Maxamed Ceydiid ayaa xalay digniin u soo jeediyay Gen. Ismaaciil Qaasim Naaji oo ah abaan duulaha ciidamada Dowladda KMG ah. Sarkaal kaas ayaa ku hanjabay in ay talaabo adag ka qaadi doonaan Gen. Naaji oo uu ku tilmaamay in uu yahay nin Xamar u jooga inuu dagaalo sokeeye ka huriyo.

" Dulqaadkii aan u heynay Naaji waa naga idlaaday, waxana ku wargelineynaa eheladiisa gudaha iyo dibadda dalka ku sugan in ay naga kaxeystaan, haddii kale waxa uu noqon doonaa kuwa ka hoos maray carada" ayuu yiri sarkaalkaas oo intaas sii raaciyay in Gen. Naaji magaciisa runta ahi uu yahay Ismaaciil Seef Naaji Al-Dacows.

Gen. Naaji ayaa doraad u sheegay Ciidamada Xooga Dalka in haddii Wasiirka Gaashaandhiga ee DKMG ah amar ku siiyo in ay Itoobiya ka difacaaan dalka ay ka horeyso in ay mar ay talaabo ka qaadaan wax uu ugu yeeray daba dhilifyada amxaarada ee Xamar Jooga.

XARUNTA ISMAACIIL JIMCAALE EE XUQUUQDA AADAMANAHA OO WARSAXAAFADEED CABASHO AH SOO SAARTAY.

Xarunta Dr. Ismaciil Jimcaale ee Xuquuqul Aadanaha ayaa cambaareyn dusha uga tuuray dhamaan kooxaha ka dambeeyay falalka argagixisada ee maamahan si isdaba joog ah ugu soo badanaya magaalada Muqdisho, falalkaasoo isugu jira Dil, Kufsi iyo Afduud ku macneysan qaab ganacsi.

Xaruntu waxa ay sheegtay in ay ka codsaneyso waxgaradka iyo hogaamiya dhaqameedyada aay ka soo jeedaan maleeshiyad uu u afduubanyahay dhibane Prof. Maxamed Cali Abuukar inay xil iska saaraan sidii si sharuud la'aan ah loogu sii deeyn lahaa, ayadoo sheegtay in aay ogaadaan kuwa xadgudbaya inloo diiwaan gelin doono xadgudubyadooda isla markaana la horkeenayo sharciga waqti aan fogeeyn, ayaa lagu yiri warsaxaafadeedkaasi oo ay ku saxiixnayd marwo Maryan Xuseen Awreeye.

XASAN ABSHIR " Xiriir naga dhexeeya itoobiya ma jiro" Ra'iisul Wasaaraha dowladda KMG ah oo shalay u waramayay Idaacada IQK ayaa sheegay in aysan wax aqabad ah ku noqon karin labadii wasiir ee dhawaan iska casilay golihiisa wasiirada.

"Shirkasta oo dib u heshiisiin ah haba ugu horeeyo kan lagu qabanaayo Nairobi waan ka qeeybgeleynaa, laakin shir Itoobiyo ku jirto ayaa dhabar-jab ku ah shacbiga Soomaaliyeed" ayuu yiri Xasan Abshir Faarax, xiriir naga dhexeeya anaga iyo Itoobiyo ma jiro, waayo heshiiskii aan soo galnay ayada ayaa bur burisay ayuu sii raaciyay hadalkisa Ra'iisul wasaare Xasan Abshir.

DOWLADDA KENYA OO LAGU EEDEYAY IN AY SI XUN ULADHAQANTO QAXOOTIGA SOOMAALIYEED.

Hay'adda dooda xuquuqda aadanaha ee dalka Kenya aya si weeyn ugu dhaleeceysay dowladda Kenya in ay si xun ula dhaqanto qaxootiga Soomaaliyeed ee dhawaan ka soo barakacay Buula-Xaawo dagaaladii ka dhacay oo ay iskaga hor yimaadeen maliishiyooyin kala taageersan SRRC iyo Dowladda KMG ah.

Xaqootigaasi ayaa Hay'addu sheegtay in ay macluul ugu dhinteen 8-caruur ah o ku jiray xerada Mandheera kana mid ah qaxootiga Soomaaliyeed ayadoo Dowladda Kenya aay xaqootigaasi u isticmaashay sameecada ay ugu caga jugleyneyso qaxootiga oo ay ku lahayd ku noqdda wadankiina haddii kale waa la idin qabqabanayaa.