Abu Dhabi,30th September 2001

Wafdigii uu hogaaminayay Wasiirka Arrimaha Dibedda ee Dawladda KMG ah Ismaaciil Maxamuud Hurre (Buba) oo xalay ka soo dagay magaalada Abu Dhabi ayaa galabta waxaa ku qaabilay qasrigiisa Wasiiru Dawlaha Arrimaha Dibedda Imaaraadka Sheikh Xamdaan Bin Zaayid Al-Nahyan.

Wafdigaa oo uu ka mid yahay Wasiirka Maaliyadda Sayid Sheikh Axmed Daahir waxay in muddo ah booqasho ku joogeen Boqortooyada Sacuudiga, iyagoo dadaal ugu jiray sidii adduun dhaqaale loogu heli lahaa Dawladda KMG ah oo iminka sanad jirsatay,wax badanna aan u qabsoomin.

Booqashadanna waa tii labaad ee uu ku yimid Buba Imaaraadka, iyadoo ay jirtay inay hore u yimaadeen Imaaraadka isla sanadkan Madaxweynaha Dawladda KMG ah Cabdiqaassim Salaad iyo Wasiirkiisa Madaxtooyada qaabilsan Xuseen Saalax.

Marka laga reebo mucaawanada dhanka bani'aadinimada oo ay Dawaladda Imaaraadka u sii marsiiso dalka Somalia Hay'addeeda Samafalka ee Bisha Cas sida dhismayaalka masaajidada, qodista ceelasha biyaha ,gargaarka caafimaadka iyo ka-taakuleynta shacabka dhanka waxbarshada, adduun dhaqaale oo la sheegi karo Imaaraadku ma siin Dawladda KMG ah , waana taa ta keentay inay si joogto isaga daba yimaadaan wufuudda Dawladda KMG ah .