Abu Dhabi,13/10/2011
By Banadir.com

Waxaa tababar socon doono muddo afar bilood ah looga furay Axadii ina soo dhaaftay (09/10/2011) caasimadda dalka Isutagga Imaaraadka Carabta ee magaalada Abu-Dhabi 12 diploomaasi oo ka socda Wasaaradda Arrimaha Dibedda ee Jamhuuriyadda Soomaalia, kana kooban 10 rag ah iyo laba haween ah .

Tababarkan oo lagu qaban doono Xaruunta Imaaraadka ee Baarista iyo Daraasaadka Culuunta Istraatiijiga (Emirates Center for Strategic Studies and Research-ECSSR), waxay diploomaasiyiintan cusub ku baran doonaan duruus la xiriira manhajka barashada diploomaasiyadda, fanka hab-raaca loo adeegsado shaqadaas iyo maadooyinka kaaba oo ay ka mid yihiin barshada Culuunta dhaqaalaha iyo Xisaabaadka, qaanuunka & calaaqaadka duwaliga ah,luqadaha ajnabiga ah, iyo qalabka cariga ah ee loo adeegsado gudashada waajibaadka loo xilsaari doona, iyo ku-dhaqanka hab-maamuuska looga baahan yahay qofka diploomaasiga noqon doona.

Munaasabadii xafladii furitaanka tababarkaan waxaa dhanka dawladda Soomaaliyeed uga soo qayb galay wefdi uu hogaaminayay La-Taliyaha Ra'iisul Wasaaraha ee Arrimaha Carabta iyo Islaamka Danjire Ciise Cali Maxamed (Ciise Dheere), Agaasimaha Mac-Hadka Diploomaasiga Wasaarada Arrimaha Dibedda Mudane Yuusuf Calasow Maxamuud iyo Sii-Hayaha Safaaradda Soomaaliya u joogta dalka Imaaraadka Danjire Xuseen Mxamuud Maxamed iyo weliba xubnaha Diploomaasiyiinta ah ee ka tirsan Safaaradda Abu Dhabi .

Dhinaca Dawladda Imaaraadkana waxaa goob-joog ka ahaa munaasabadda furitaanka tababarkan Dr. Jamaal Sanad Al-Suweydi oo ah Agaasimaha Guud ee Xaruunta Imaaraadka ee Baarista iyo Daraasaadka Culuunta Istraatiijiga ah, Dr. Maxamed Axmed Bu-Qafal AL-YAASI,Agaasimaha Waaxda Tababarada Wasaaradda Arrimaha Dibedda Imaaraadka iyo Mudane Cabdalla Xasan Al-Sahlaawi oo ah Agaasimaha Fulinta hawlaha Markaska Imaaraadka (ECSSR) .

Danjire Ciise Cali Maxamed oo ah La-Taliyaha Ra'iisul Wasaaraha ee Arrimaha Carabta iyo Islaamka waxaa uu munaasabadaas ka soo jeediyay khudbad caqiiba leh oo uu ku tirtirsiiyay diploomaasiyiinta cusub inay ka faa'iideystaan fursaddan qaaliga ah oo uu nasiibkoodu siiyay,kaas oo ay ku kasban doonaan inay duruus casri ah ka qaataan markaska Imaaraadka ee (ECSSR) oo ah saldhigii cilmiga , isagoo islmarkaana xusay calaaqaadka taariikhiga ah ee u dhaxeeya labada dal ee Soomaaliya iyo Imaaraadka, kana mahad-celiyay minxadan wax ku-oolka ah oo ay Imaaraadka ugu deeqday Dawladda Soomaaliyeed iyo deeqihii isugu jiray cunnada iyo daawada oo ay Imaaraadku hore ugu soo direen shacabka Soomaaliyeed ee abaartu wax yeelaysay bartimihii sanadkan 2011.

Madaxdii ka socotay dalka Imaaraadkana waxay halkaas ka caddeeyeen inay ku soo dhoweynayaan diploomaasiyiinta Soomaaliyeed dalkoodii labaad, ayagoo ugu ballan qaaday wax alle wixii ay uga baahdaan dhalinyaradan dalka Imaaraadka , si tababarkoodu u noqdo mid guuleysta oo naajih ka noqda dhan kasta.

Faahfaahin dheeraad waxaad ka heli kartaan Warkii ay wakaaladda wararka Imaaraadka ka qortay tababarkan Halkan ka akhriso