Masuuliyiin ka tirsan isbahaysiga SNA ayaa soo saaray warsaxaafadeed ay ku sheegeen inuu Xuseen Caydiid ka qaybgalay shirkii Itoobiya isagoo metelaya beeshiisa balse aan ka socon isbahaysiga SNA.

Warsaxaafadeedkan waxaa saxiixay 10 masuul oo ka kala tirsan ururada ku midaysan Isbahaysiga SNA ee uu hogaamiyo Xuseen Caydiid, ayna ka mid yihiin Maxamad Nuur Caliyow, Guddoomiyaha SDM/SNA, Cabdulaahi Axmed Xaashi, Guddoomiye kuxigeenka SPM/SNA, Cabdikariim Axmned Cali, Xoghayaha Guud ee SNA, Prof. Ciise Maxamad Siyaad, Xoghayaha Arrimaha Dibadda ee SNA, Maxamad Cusmaan Xaydar, Guddoomiye kuxigeenka SDM/SNA, Maxamad Cumar Dalxa, Xoghayaha Guud ee SAMO/SNA, Cabdulaahi Cosoble Barre, Lataliyaha Sharciga SNA, Maxamad Siyaad Naaleeye, Guddoomiyaha GASNA ee SNA iyo masuuliyiin kale, waxaana lagu xusay in ururada ku midaysan SNA at ka maqnaayeen shirkii ay Itoobiya ku yeesheen qaar ka mida Hogaamiye Kooxeedyada Soomaaliyeed, Xuseen Caydiidna uu u metelayey shirkaas beeshiisa.

Warsaxaafadeedkaas waxay ururada SNA ku sheegeen in Itoobiya iyo Soomaaliya ay ka dhaxayso colaad gaamurtay oo soo jirtay qarniyaal sidaas darteedna aanay Itoobiya marnaba raali ka ahayn in ay Soomaliya ka dhisanto dowladda iyada ka madaxbanaan.

Masuuliyiinta Isbahaysiga SNA waxay sidoo kale qoraalkooda ku cadeeyeen in ay Itoobiya abuurtay kooxo soomaaliyeed oo ay siyaasadeeda ku fushato hadii uu Isbahaysiga SNA uu ku biiro kooxahaasna uu lumin doono taageerada uu ka haysto shacabka Soomaaliyeed. Ugu danbayntii wuxuu warsaxaafadeedkaasi ku baaqay in anaan Itoobiya lala yeelan wax xiriir siyaasadeed ah.