Jeddah(SPA)14/08/2002, By Banadir.com

Amiirka leh dhaxalka Boqornimo ee Boqortooyada Sacuudiga Amiir Cabdalla Bin Cabdulaziz Al-Sacuud ayaa shalay ku qaabilay Xafiiskiisa ku yaala magaalada Jeddah Madaxa Golaha Wasiirada Dawladda KMG ah Mudane Xasan Abshir Faarax iyo wafdiguu hogaaminayay oo uu ka mid ahaa Wasiirka Dalxiiska Xasan Faarax Xujaaleh, oo beryahanba booqasho ku joogay Sacuudiga .Waxaana qaabilaadaas goobjoog ka ahaa Wasiirka Arrimaha Dibedda ee Sacuudiga Amiir Sacuud Al-Feysal .

Sida ay soo warisay Wakaaladda Wararka Sacuudiga (SPA), wuxuu Xasan Abshir la socodsiiyay Amiir Cabdalla xaaladda dhabta ah ee maanta Soomaaliya ku sugan tahay oo ah mid murugo leh iyo dagaalada ka socda gobolo badan oo dalka ah iyo sida ay lama huraan u tahay in caalamku u soo gurmado shacabka aan waxba galabsan ee kooxaha hubeysan gumaadka ku hayaan . Wuxuu kaloo ka codsaday in Boqortooyada Sacuudiga gargaar maaliyadeed oo kale u fidiso Dawladda KMG ah . Sida laga war qabo , waxay Sacuudi Caraabiya kal hore siisay Dawladda KMG ah ee uu madaxda ka ahaa Cali Khaliif Galeydh 15 milyan oo Doollarka mareykanka.