Nairobi,5th November 2001
Report prepared by Banadir.com

Madaxweynaha Kenya Danial Arab Moi ayaa maanta ku soo gebegebeeyay Xaruunta Madaxtooyada Kenya shirkii nabadeynta Soomaalida ,wuxuuna sheegay inuu qabo in khilaafaadka u dhexeeyay labada dhinac ee kala ah Dawladda KMG ah iyo qolooyinka mucaaradka ku ah inuu yaraaday, sidaas darteedna ay Kenya kala tashan doonto dalalka jaarka la ah Soomaalia sidii loo qaban lahaa shir sal ballaarran oo ay isugu yimaadaan dhamaan kooxaha isaga soo horjeeda , gaar ahaana kuwii iminka qaadhacay shirkan Nairobi lagu qabtay, si loo dhameeyo dhibaatada Soomaaliya ka taagan .

Dhanka wadahadalada shirkan Nairobi waxaa lagu heshiiyay in la dhaqangeliyo go'aamadii shirkii 8aad ee madaxda wadamada ku jira Ururka goboleedka IGAD iyo ka golaha ammaanka ee Qaramada Midoobay ka soo saaray dhowaan arrinka Somalia iyo in la bedelo shuruucda qaranka , si loo waafajiyo baahida jirta .

Waxaa kaloo lagu heshiiyay in la sameeyo xukuumada loo dhan yahay iyadoo dhamaan khilaafaadka jira lagu dhameynayo hab nabadeed .

Ugu danbeyn , wuxuu Madaxweyne Moi u sheegay madaxdii soomaaliyeed inuu amray in la furo xadka labada dal , taasna ay tahay niyad wanaag iyo inuu la jecel yahay ummaadda Soomaaliyeed nabad waarta .