Mogadishu,21st October 2001

Report prepared by Banadir.com

Kalfadhigii 3aad ee Baarlamaanka KMG ah ayaa saaka ka furmay Muqdisha, iyadoo sidii la filayay ay 14 mudane soo hordhigeen golaha mooshin kalsoonida loogala noqonayo Dawladda KMG ah ee uu Cali Khaliif Madaxda ka yahay .

Intaan la gudagalin doodaas, ayaa Cabdi Cusmaan Faarax oo ah madaxa guddi hoosaadka Baaralamaanku hore ugu xilsaaray la-xisaabtanka Dawladda halkaa ka soo jeediyay hadal uu ugu sheegayay golaha inay kala kulmeen baaritaankooda caqabado waaweyn, gaar ahaana Hay,adaha maamulka Dawladda sida Wasaaradda Maaliyadda iyo Bankiga Dhexe, kuwaas oo haba yaraatee aan sinnaba guddiga u qancin hawlahooda .

Waxaa markaa kadib hadalkii qaatay laba mudane oo la kala yiraahdo Faarax Xasan Maxamed iyo Cabdirizaaq Muuse Xersi oo si kulul ugu canbaareeyay Dawladda KMG ah inay ku guuldarreysatay waxqabadkeeda, kuna fashilanatay hawl kasto oo ay ku dhaqaaqday tan iyo intii ay maamulka soo haysay, lana gaaray waqtigii uu Baarlamaanku kala noqon lahaa kalsoonida. Qodobada ay soo qaateen labadaa mudane waxaa ugu muhiimsanaa :-

1) Fashilaadda dhanka dhaqaalaha ( Canshuur la'aanta jirta iyo sicir barar xad-dhaaf ah oo ku yimid shillinka soomaaliga ah )

2) Fashilaad dhanka maamulka Dawladda ( Hay,adihii dawaladda oo aan la dhisin iyo dishibilln xuma ka jirta golaha wasiirada dhexdiisa,taas oo keentay in la kala lunsado xoolihii yaraa ee la helay, wasiiradiina ay shaqo ka dhigteen inay dibadaha iska warwareegaan )

3) Fashilaad dhanka sugidda amniga gudaha ah ( magaalada muqdisha iyo gobalada dalka oo aan maamul iyo amniba ka jirin )

4)Fashilaad dhanka siyaasadda dibedda ah, gaar ahaana Dawladaha Jaarka ah oo aan la kasban , dawladdauna aaney lahayn qorshe xiriirsan oo ku wajahan arrintaa.

Markaa kadib waxaa golaha ka bilowday buuq xoog leh oo ay isaga hor yimideen qolooyinka taageersan Dawladda KMG ah iyo kuwa ka soo horjeeda, waxaana soo dhexgalay Guddoomiyaha Cabdalla Deerow oo sheegay inay lama huraan tahay in la dhawro nidaamka, lana ogaado in mudane kasta uu xaq u leeyahay inuu soo bandhigo fikradiisa khaaska ah, halkaana waxaa iska diiwaan galiyay ilaa iyo kontameeyo mudane oo doonaya inay ka hadlaan mooshinka, iyadoo dooduna dib u furmi doonto berrito hadii eebbo idmo. .