Gudoomiyaha gobolka Banadir ahna Duqa magaalada Muqdisho Mudane Maxamuud Xasan Cali Cadde Gaabow ayaa waxa uu ku baaqay in la joojiyo dagaaladda ka socda Magaaladda Muqdisho, ka dib shir Jaraa'id uu maanta ku qabtey Magaalada Muqdisho.

Mudane M. Xasan Gaabow

Mudane M. Cadde Gaabow, Gudoomiyaha gobolka Banadir ahna duqa magaalada Muqdisho Shirkaan Jraa'id ee Gudoomiyaha gobolka Banadir ahna Duqa magaalada uu ku qabtey Hotelka Nabadda ee magaalada Muqdisho ayaa waxa uu kaga hadlay safaro uu ku soo bixiyay dalal dhowr ah, isagoo sheegay in kulamo uu kula soo qaatay wadanka Mareykanka Mayorada 8 gobolka oo ka tirsan dalkaasi, oo uu sheegay in ay u balan qaadeen in dib u dhis lagu sameynayo goobaha dagaaladu ay burburiyeen ee gobolka Banadir.

Mudane M. Cadda Gaabow ayaa soo hadal qaaday dagaalada ka soo cusboonaaday magaalada Muqdisho, isagoo ugu baaqay qeybha dagaalka uu u dhexeeyo in dagaalka ay joojiyaan, isla markaana ay ka shaqeeyaan nabadda iyo badabaadinta umadda, waxaa kale uu ka dhawaajiyay in loo baahan yahay wada shaqeyn balaaran loo muujiyo midowga maxkamadaha islaamiga, maadaama uu sheegay in ay yihiin kuwo door muhiim ah ka qaatay sugida nabadgalyada.

Mudane M. Cadde Gaabow ayaa dhinacyada dagaalamaya ku booriyay in si deg deg ah dagaalka loo hakiyo, isla markaana waxii khilaaf ah lagu dhameeyo wada hadal, isagoo ka codsaday waxgaradka, siyaasiyiinta iyo qeybaha kala duwan ee bulshada in ay u istaagaan joojinta colaadaasi, waxaana uu tilmaamay in kulamo uu la qaadan doono qeybaha kala duwan ee Bulshada.