Waxay madaxda qaar ka mid ah Dugsiyada Dawladda si aad ah ugu riyaaqeen talooyinkii uu dhowaan Baarlamaanka Imaaraadka u soo jeediyay Golaha Wasiirada ee la xiriiray inay dib uga fiirsadaan go'aankii looga mamnuucay ardeyda Carabta ah iyo kuwa ajaanibta ah Dugsiyada Dawladda , sidaas waxaa qortay Jariidada Al-Khaliij ee ku soo baxda luqada Carabiga ah, cadadkii soo baxay Jimcihii 29ka June 2001 .

Warku wuxuu intaa ku darayaa in Golaha Baarlamaanka uu si gaar ah ugu adkeeyay Golaha Wasiirada in ardada Carabta ah la siiyo tixgelin gaar ah , go'aanka mamnuucidana gebi ahaan laga daayo .

Sida la ogsoon yahay , go'aanka Golaha Wasiirada ee looga mamnuucay ardayda Carabta Dugsiyada Dawladda Sanad-Dugsiyeedka soo socda ee bilaabanaya 1da September 2001 wuxuu culeys iyo welwel ballaaran ku hayay Jaaliyadda Soomaliyeed ee ku nool Imaaraadka , oo awalba dakhligooda iska liitay .

Waxaa kaloo jirta in horeba loo kordhiyay qiimaha Iqaamadaha iyo adeegyada guud ee Maamulka Dawladda, iyadoo iminka guud ahaanba lacag laga dhigay hawlaha Caafimaadka iyo Cisbitaalada wixii ka danbeeyay bilowgii bishii May 2001. Report prepared by Banadir.com