Abu Dhabi,04/08/2011
By Banadir.com

Sii-Hayaha Safaaradda Soomaaliyeed ee ka furan dalka Isutaga Imaaraadka Carabta Mudane Xuseen Maxamuud Maxamed ayaa uga mahad celiyay madaxda dawladda Isutagga Imaaraadka Carabta, gaar ahaana Madaxweynahooda Sheikh Khalifa Bin Zaayid Al-Nahyaan, gargaarkii dhanka cunnada quutal-daruuriga ahaa oo ay u fidiyeen dadka Soomaaliyeed ee Abaaruhu wax-yeelada ka soo gaartay.

Gargaarkan oo u qaybsan dhawr qaybood ayaa qaybta ugu horreysa waxaa lagu gaarsiin doonaa gobolada abaartu ku dhufatay cunnada quutal daruuriga ah sida bariiska, burka, timirta, saliidda, sonkorta ,daqiiqda galeyda iyo teendhooyin. Halka qaybaha kale ay noqon doonaan kuwa kaaba dhismaha nolosha dadka qaybahiisa kala duwan , gaar ahaan taakuleynta caafimaadka,dhar ay hugtaan dadka iyo barnaamij la xiriira qodista ceelasha biyaha la cabbo .

Wuxuu kaloo sii-Hayha Safaaradda Soomaaliyeed Mudane Xuseen maxamuud Maxamed ugu hanbalyeeyay madaxda Imaaraadka munaasabadda weyn ee lagu soo dhoweynayay dhalashada bisha barakeysan ee Ramadaanka,fadlan ka aqriso maqaalkii oo afka carabiga ah oo ku soo baxay jariidada Al-Khaliij, adigoo gujinaya linkigan : http://www.alkhaleej.ae/portal/3236b142-9488-4efb-87cc-adb0b40f4d6d.aspx