Madaxwaynaha DFKMG ah ee Soomaaliya Mudane Cabdullahi Yuusuf iyo Ra?iisul Wasaare Geedi oo shalay ku saxiixay xarunta Guddiga Midoowga Yurub heshiis ah Memorandum of Understanding.

Prof. Geedi, M. Yuusuf, Mr. Barosso, iyo Mr. Michel

Madaxwaynaha DFKMG ah ee Soomaaliya Mudane Cabdullaahi Yuusuf iyo Ra?iisul Wasaare Geedi ayaa shalay ku saxiixay xarunta Guddiga Midoowga Yurub heshiis ah Memorandum of Understanding.
Madaxda sare ee DFKMG ah ee Soomaaliya ayaa kulan la qaatay Madaxa Guddiga Midoowga Yurub Mr. Barroso iyo Madaxa Gar-gaarka iyo Horumarinta Midoowga Yurub Mr. Michel iyago kulanka kadib si rasmi ah uga warbixiyay saxaafada waxa uu ku saabsanaa heshiiska ay wada saxiixdeen Madaxda, halkaasna ay si wada jir ah ugu qabteen shir saxaafadeed goobta la yiraahdo VIP Corner ee ah halka lagala hadlo saxaafada oo ku taal gudaha xarunta guddiga Midoowga Yurub, ugu horeyntiina waxaa furey Madaxa Guddiga Midoowga Yurub Mr. Barroso oo ku soo dhoweeyey Madaxda DFKMG ah ee Soomaaliya isagoo sheegey wakhti badan kaddib Soomaaliya markii ay ku jirtay marxalad adag iyo dhibaato in ay maanta suurto gashay in ay dowlada cusub heshiis la saxiixdaan Midoowga Yurub. Heshiiskaan oo u ogolaanaya Dowlada Soomaaliya in dib loogu furo deeqaha iyo barnaamijyada dib u dhiska dalka Soomaaliya, sidoo kale ayuu Mr. Barroso ugu hanbalyeeyay Madaxda sare ee Soomaaliya in ay yihiin kuwo doonaya in ay u istagaan maanta
dib usoo celintii nabada dalka Soomaaliya iyo dib u heshiisiinta, wuxuuna balan qaaday isagoo ku hadlaaya magaca Guddiga uu Madaxda u yahay ee Midoowga Yurub iyo Madaxa Horumarinta Mr. Michel in ay ka taageeri doonaan dib usoo celinta nabada gaar ahaan nabadaynta magaalada Muqdisho.

M. Yuusuf
Waxaa ku xigay oo hadalka qatay Madaxwayne Yuusuf oo sheegay in uu ku faraxsan yahay kala saxiixashada heshiiskaan oo uu ku sheegey mid albaabada u furaaya Soomaaliya soo noqoshadeeda, wuxuuna uga mahadceliyay Midoowga Yurub tageerada ay markasta la garab taagnaayeen Soomaaliya, isagoo ku daray in ay si wada jir ah u wada shaqayn doonaan mustaqbalka si saxiibtinimo leh.

R.W Geedi

Waxaa ku xigay Ra?iisul Wasaaraha DFKMG ah ee Soomaaliya Mudane Geedi oo isagu ku shaagay saxiixa heshiiskaan ay kala saxiixdeen Midoowga Yurub iyo Dowlada Soomaaliya in uu yahay dhacdo taariikhi ah oo sheegaysa in ay Soomaaliya soo laabatay kaddib dagaalo sokeeye oo qaatay 15 sano

Commissionner Michel

Mr. Michel oo ku xigay ayaa sheegay isna inuu tagi doono dalka Soomaaliya bartmaha bisha May ee sanadkaan kaddib markii uu ka helay casumaad Gudoomiyaha Baarlamaanka DFKMG ah ee Soomaaliya Mudane Shariif Xassan,

Waxaa ii suurto gashay in aan fursad u helo su?aashii ugu horeysay anigoo ka mid ahaa dhowr saxafi oo loo ogolaaday in ay ka qayb galaan shirkaas jaraa'id oo kala aniga iyo wariye ka socda TV Universal iyo wariye ka socda BBC laanta afka Soomaaliga waxaana ku su'aalahayga ku waydiiyay luuqadda Afka Soomaaliga Madaxayne Yuusuf iyo Ra?iisul Wasaare Geedi, ugu horreyntiina waxaan waydiiyay su?aal Madaxweyne Yuusuf taasoo ahayd :

Su?aal : Mudane Madaxwayne waxaad adduunka ka dalbataa mar kasta in dalka la keeno ciidamo shisheeye, isla markaana laga qaado cunaqabataynta hubka dalka Soomaaliya arrimahaas ma kusoo qaaday guddiga Midoowga Yurub haddii aad kusoo qaadayse maxay kaa yiraahdeen ?

Jawaab : Marka hore su?aasha anigaad igu hormarisay, af Soomaali ayaad wax nagu su?aashay af Soomaali ayaanu kaaga jawaabaynaa.
Soomaaliya xaaladeeda waa la ogyahay, 15 sano oo lasoo dhaafay siday ku jirtey waa la og yahay haddeer wali Muqdisho waxa ka socda waa la soconnaa, waxay ila tahay amniga Soomaaliya inuu u baahan yahay in deg deg wax looga qabto, waxaanan aaminsanahay, oo aan qabaa in golayaasha dowladu ay qabaan in loo baahan yahay Soomaaliya amnigeeda si wax looga qabto in ciidamo shisheeye la keeno, ciidamo Soomaaliyeedna dib loo dhiso, si wadanka amnigiisa wax looga qabto, xasiloonidii loo soo celiyo, dadka loo heshiisiyo hubkana la iskaga dhigo, dabeedna midnimadii inta la soo celiyo oo tafaraaruq baa dhacayee la soo celsho in loo soo jeesto sidii dib loogu dhisi lahaa Soomaliya, oo lagu horumarin lahaa iyadoo qaranimadii iyo sharafkii iyo midnimadii ummada Soomaaliyeed la ilaalinayo oo la dhoowrayo, waana mahadsan tahay.

Waxaa sidoo kale su?aal waydiiyay Ra?iisul Wasaare Geedi taaso ahayd :

Su?aal : Mudane Ra?iisul Wasaare waxaan ku waydiinayaa kulankaan iyo kulankii aad bishii November ee lasoo dhaafay la yeelatay Commissioner Michel maxay ku kala duwan yihiin ?, Mr. Michel wuxuu dowladaaada u ballan qaaday dhaqaale badan wali wax doowladiina soo gaaray ma jiraan ?

Jawaab : Safarkayga hore iyo midkaan aan ku nimid magaalada Brussels, kii hore wixii lagu ballamay ayaa iyagoo dokument ah la saxiixay maanta, waana jidka furi kara kaalmada caadiga ah ama tooska ah ee Midoowga Yurub uu siin karo dalka Soomaaliya, inkastoo waligood ay ahaayeen deeq bixiyeyaasha ugu waynaa ee Soomaaliya.

Saida Sheikh Ahmed VIP
EU Press Section
Brussels Belgium